A Asociación de Empresarios de Vilalba pon en marcha a campaña de verán “Marcho que teño que marchar”, unha iniciativa destinada a promover as compras no comercio local durante o inicio da tempada estival e a lembrar á veciñanza que en Vilalba pode atopar todo o que precisa antes de marchar de vacacións, de escapada ou a desfrutar dos seus plans de verán.
A campaña desenvolverase do 22 de xuño ao 5 de xullo de 2026 nos comercios asociados participantes, co obxectivo de incentivar o consumo de proximidade e poñer en valor a ampla variedade de produtos e servizos que ofrece o tecido comercial vilalbés.
Moda, calzado, complementos, agasallos, produtos de tempada, servizos profesionais ou axencias de viaxes son só algunhas das opcións que a clientela pode atopar no comercio local de Vilalba para preparar o verán sen ter que desprazarse fóra da vila.
Como agradecemento ás persoas consumidoras que escollan mercar nos establecementos participantes, a campaña incluirá o sorteo de 1.000 euros en vales de compra, repartidos en dous vales de 500 euros para gastar no comercio local.
Durante as datas da campaña, as persoas que realicen as súas compras nos comercios asociados poderán conseguir participacións para entrar no sorteo, contribuíndo ao mesmo tempo a apoiar a economía local e a manter vivo o comercio de proximidade.
Con esta iniciativa, a Asociación de Empresarios de Vilalba quere reforzar a mensaxe de que mercar no comercio local é tamén apostar pola vila, polas persoas que atenden cada día os seus negocios e pola actividade económica do municipio.
A campaña “Marcho que teño que marchar” está organizada pola Asociación de Empresarios de Vilalba e conta coa colaboración da Xunta de Galicia, Comercio Galego e o Concello de Vilalba.
Este verán, antes de marchar, merca en Vilalba.
