A Asociación de Empresarios de Vilalba realizou este venres o primeiro sorteo da súa canle de difusión de WhatsApp, unha iniciativa posta en marcha para manter informada á cidadanía sobre campañas, promocións, novidades e actividades relacionadas co comercio local.
Este primeiro sorteo serviu para premiar a fidelidade das persoas que forman parte da canle, repartindo dous vales de compra de 100 euros para consumir nos establecementos do comercio local vilalbés. Os números premiados nesta ocasión foron anunciados pola mesma canle de Whatsapp e posteriormente informados de forma individual.
Este é o primeiro dunha serie de sorteos que se realizarán de forma periódica. De feito, o último venres de cada mes levarase a cabo un novo sorteo entre todas as persoas que formen parte da canle de WhatsApp, co obxectivo de incentivar o consumo de proximidade e recompensar a confianza dos consumidores que apostan polo comercio local.
A través desta canle, a Asociación de Empresarios de Vilalba busca crear unha vía de comunicación directa coa veciñanza, compartindo información de interese e ofrecendo vantaxes exclusivas ás persoas subscritas.
Desde a Asociación agradecen a boa acollida que está a ter esta iniciativa e animan a todas aquelas persoas que aínda non forman parte da canle a unirse para participar nos próximos sorteos e estar ao día de todas as campañas e actividades que se desenvolvan ao longo do ano.
Con accións como esta, a Asociación reafirma o seu compromiso coa dinamización económica de Vilalba e co apoio ao comercio de proximidade, un sector fundamental para a vida social e económica do municipio.
Recorda que aínda estás a tempo de unirte a través do Código QR fixado na conta de instagram de @empresarios.vilalba ou enviando “comercio local” ao 628947918
