A Asociación de Empresarios de Vilalba confirma que o Desfile do Comercio Local se celebrará o sábado 18 de outubro de 2025 ás 19:30 horas no Auditorio Municipal Carmen Estévez.
O cambio de data responde a cuestións organizativas co obxectivo de ofrecer un espectáculo de maior calidade, que permita lucir mellor as propostas das tendas participantes e garantir unha experiencia máis completa para o público asistente.
A directiva da Asociación subliña que xa se está traballando intensamente na preparación do evento, co fin de pechar unha escaleta dinámica que incluirá pases de moda, actuacións musicais e algunhas novidades que se irán desvelando nos vindeiros días.
O desfile converterase un ano máis no gran escaparate do comercio local, poñendo en valor o esforzo e a creatividade dos establecementos vilalbeses e reforzando a importancia de apoiar o consumo de proximidade.
“Queremos que o público goce, que os comercios teñan a mellor visibilidade posible e que o evento se consolide como unha cita imprescindible no calendario cultural e social de Vilalba”, sinalan dende a entidade.
