A Consellería de Emprego, Comercio e Emigración da Xunta de Galicia publicou unha nova convocatoria de subvencións de apoio ao emprendemento, dirixidas a persoas autónomas e pequenas e medianas empresas, co obxectivo de apoiar investimentos xa realizados e mellorar a competitividade dos negocios en Galicia.
Estas axudas concédense en réxime de concorrencia competitiva, polo que as solicitudes serán valoradas por puntos en función dos distintos criterios establecidos nas bases reguladoras, concedéndose por orde de puntuación ata o esgotamento do crédito dispoñible.
Prazo de solicitude
O prazo para presentar solicitudes permanecerá aberto ata o 2 de marzo de 2026.
Investimentos subvencionables
Os investimentos deberán estar realizados e pagados entre o 1 de xullo de 2025 e a data de presentación da solicitude. Entre os conceptos subvencionables inclúense, entre outros:
- Equipamento informático (agás teléfonos móbiles)
- Maquinaria, mobiliario e ferramentas
- Programas informáticos, páxinas web e activos intanxibles
- Reformas e acondicionamento do local de negocio (non vivenda habitual)
- Investimentos en eficiencia enerxética
- Gastos notariais e/ou rexistrais (ata 300 €)
- Gastos de alugueiro do local (ata 1.500 €)
Importe e porcentaxes da axuda
O investimento mínimo subvencionable será de 5.000 € (IVE excluído). As porcentaxes de axuda serán as seguintes:
- De 5.000 € a 20.000 € → 55 %
- De 20.001 € a 30.000 € → 50 %
- De 30.001 € a 60.000 € → 45 %
- Incremento adicional do 10 % no caso de remuda de negocio (Bono Remuda)
