A Consellería de Emprego, Comercio e Emigración publicou no Diario Oficial de Galicia a orde pola que se establecen as bases reguladoras das subvencións para o impulso da innovación e da sustentabilidade do comercio local e artesanal, correspondentes ao ano 2026 (procedemento CO300C)
Esta convocatoria ten como obxectivo apoiar aos comercios e talleres artesáns galegos na modernización dos seus establecementos, na dixitalización dos seus negocios e na implantación de medidas de sustentabilidade ambiental.
Quen pode beneficiarse?
- Comercios minoristas con tenda física en Galicia (pemes de ata 10 persoas traballadoras).
- Talleres artesáns inscritos no Rexistro Xeral de Artesanía de Galicia. (Unha única solicitude por establecemento.)
O prazo para presentar solicitudes ábrese o 16 de xaneiro de 2026 ás 9:00 horas e será dun mes ou ata esgotar o crédito dispoñible. Esta axuda concédese en réxime de concorrencia non competitiva, é dicir, por orde de entrada das solicitudes completas e correctas.
Serán subvencionables investimentos realizados e pagados desde o 25 de outubro de 2025, relacionados con:
- Dixitalización e innovación (páxinas web, software de xestión, TPV, redes sociais, ciberseguridade, etc.).
- Modernización comercial (reformas, mellora da imaxe do local, eficiencia enerxética, equipamento).
- Sustentabilidade ambiental (embalaxes sostibles e redución do uso de plásticos).
Intensidade da axuda:
- Ata o 80 % do investimento subvencionable (IVE excluído).
- Incremento adicional do 10 % para comercios situados no ámbito do programa Vilas Vivas.
- Investimento mínimo subvencionable: 1.000 €.
- Posibilidade de solicitar un anticipo do 50 % da axuda en determinados casos.
A solicitude deberá presentarse exclusivamente por vía electrónica a través da sede electrónica da Xunta de Galicia empregando o procedemento CO300C, neste enlace.
Desde a Asociación animamos ás persoas socias interesadas a revisar a orde con antelación e preparar a documentación necesaria, xa que a orde de presentación será determinante para a concesión da axuda.
Para calquera dúbida ou para recibir asesoramento individualizado, as persoas socias poden poñerse en contacto con nós a través do correo electrónico contacto@empresariosvilalba.com ou chamando ao 628947918.
